Áhættustýring
Áhættustjórnun er hluti af stjórnkerfi félagsins í þeim tilgangi að tryggja árangursríkan, ábyrgan og samfelldan rekstur. Áhersla er lögð á að styðja við grunnhlutverk félagsins, að flytja raforku með samfelldum, öruggum og hagkvæmum hætti. Öryggi starfsmanna, samstarfsaðila og viðskiptavina er haft að leiðarljósi. Þá er áhersla lögð á að fjárhagsleg staða félagsins sé ávallt traust.
Framkvæmd áhættustjórnunar tekur mið af meginreglum og leiðbeiningum alþjóðlegra staðla. Stjórnendur og lykilstarfsmenn auðkenna áhættu, fjárhagslega og ófjárhagslega, og leggja mat á mikilvægi hennar. Í framhaldi af auðkenningu er áhætta flokkuð, metin og meðhöndluð.
Nýjar sjálfbærnireglugerðir hafa tekið gildi á Íslandi. Kortlagning á sjálfbærniáhættum er hafin, en þær taka til umhverfisþátta, félagslegra þátta og stjórnarhátta. Mat á sjálfbærniáhættum er hluti af almennu áhættumati félagsins og verður áfram unnið með þær á komandi árum.
Til staðar eru viðbragðs- og endurreisnaráætlanir til þess að tryggja samfelldan rekstur. Þar á meðal eru viðbragðsáætlanir vegna stærri atburða sem geta haft veruleg áhrif á rekstur félagsins, svo sem vá vegna óveðurs, jarðskjálfta, eldgosa, truflana o.s.frv. Á árinu reyndi á viðbragðsáætlanir, til dæmis í tengslum við bilun Vestmannaeyjalínu 3 og í tengslum við eldgos á Reykjanesi, líkt og fjallað er um annars staðar í árs- og sjálfbærniskýrslunni.
Fjárstýring og fjármögnun
Í samræmi við fjárstýringar- og fjármögnunarstefnu félagsins er markmið fjárstýringar að tryggja að ávallt sé til staðar nægt laust fé til þess að sinna rekstri og standa við skuldbindingar. Áhersla er á að varðveita eigið fé og stuðla þannig að fjárhagslegum styrk. Við stýringu á fjármálaáhættu er miðað við varfærna nálgun. Að teknu tilliti til áhættu er leitast við að lágmarka fjármagnskostnað og hámarka fjármagnstekjur.
Eitt af áhersluatriðum er að styrkja fjármögnun félagsins til lengri tíma með því að breikka hóp lánveitenda. Skref í þá átt voru tekin á árinu. Langtímafjármögnun ársins nam 123,7 milljónir USD. Annars vegar voru gefin út skuldabréf og seld til erlendra fagfjárfesta, samtals að fjárhæð 60 milljónir USD. Hins vegar var skrifað undir lánasamning við Evrópska fjárfestingarbankann (EIB) að fjárhæð 63,7 milljónir. Þetta var í fyrsta skipti sem Landsnet fær lán hjá EIB. Lánið var veitt til styrkingar byggðalínunnar með áherslu á verkefni á Norðausturlandi. EIB leggur mikla áherslu á loftslagsmál. Verkefni Landsnets sem leggja grunn að auknu afhendingaröryggi og stuðla að orkuskiptum falla því vel að áherslum bankans.