Árið 2023

Þannig var árið okkar hjá Landsneti – ár krefjandi verkefna, stórra viðgerða, breytinga, nýsköpunar, umhverfis, veðurs, ísingar, jarðhræringa, samtals, uppbyggingaráforma og ár þar sem öllum góðum hugmyndum var fagnað.

Við fluttum lífsgæði í miklu magni á landi og í lofti – rafmagn sem er undirstaðan í öflugum samfélögum, veitir von, byggir upp og leggur grunn að daglegu lífi hjá okkur. Og okkur gekk vel, þrátt fyrir nokkrar stórar truflanir, veður, ísingu og jarðhræringar.

Hér stiklum við aðeins á stóru og horfum til baka á sögurnar sem stóðu upp úr á okkar miðlum – sögur þar sem okkar fólk stóð í stafni, yfirvegað og öruggt.

Árið byrjaði með hvelli, veðurviðvörunum og óvæntri bilun á Vestmanneyjastreng 3 og ljóst varð að framundan yrði löng og umfangsmikil viðgerð þar sem við þyrftum að hugsa út fyrir boxið. Allar hugmyndir voru góðar hugmyndir og ein þeirra, að tengja saman leiðara úr tveimur biluðum strengjum, skilaði okkur því að við þurftum varla að brenna olíu til að halda Eyjunum gangandi þessa sex mánuði sem strengurinn var bilaður – umhverfisvænt og við spöruðum um leið umtalsverðar fjárhæðir.

Línurnar með langa nafninu, Holtavörðuheiðarlínur 1 og 3, áttu sviðið þegar kom að undirbúningi og samtali, línur sem munu eiga stóran þátt í orkuskiptunum og leiðinni að settum markmiðum.

Við vorum líka í framkvæmdum í kringum höfuðborgina og tókum m.a. niður gömul möstur sem höfðu þjónað okkur vel og lengi voru bútuð niður á staðnum og send í endurvinnslu. Möstur í Kolviðarhólslínu 1 voru felld og voru ný möstur reist. Hluti af svæðinu sem unnið er á er vatnsverndarsvæði og fylgdi framkvæmdinni ítarleg áhættugreining.

Við lögðum líka nokkra jarðstrengi á árinu, við Fitjar á Reykjanesi og í Kópaskerslínu. Og talandi um jarðstrengi, þá tókum við þátt í tilraun til að mæla áhrif hrauns og hita á stæður, stög og strengi en í þetta skipti náði hraunið ekki að renna nógu langt til þess að við gætum lokið við tilraunina, tilraun sem aldrei áður hefur verið gerð í heiminum.

Jarðhræringarnar voru í stóru hlutverki í sögu ársins og við vorum um tíma með starfsemina okkar á neyðarstigi vegna mögulegs eldgoss á svæðinu í kringum Svartsengi. Flutningskerfið stóð af sér jarðskjálftana og við hækkuðum mastur í Svartsengislínu til þess að línan gnæfði yfir garðinn, varnargarðinn sem verið er að reisa í kringum Svartsengi.

Veður setti líka mark sitt á árið – veðurviðvaranir, vindur og ísing og það var nóg að gera hjá okkar fólki í netrekstrinum og stjórnstöðinni – vinna sem öll var unnin af mikilli yfirvegun og öryggi eins og okkar línugengi einu er lagið.

Sögulegt samkomulag var gert við Sveitarfélagið Voga um lagningu Suðurnesjalínu 2, samkomulag sem var mikið fagnaðarefni fyrir okkur öll.

Ljós veitir von og við tókum þátt í að senda varahluti til Úkraínu og þannig leggja okkar af mörkum til að aðstoða við endurreisnina á flutningskerfinu þar. Hvað framtíðin þar ber svo í skauti sér er önnur saga. En í okkar huga er uppbygging orkuinnviða grunnforsenda framtíðar, bæði þar og hér heima.

Við gáfum út í fyrsta skipti okkar eigin raforkuspá þar sem flutningskerfi raforku er lykilþátturinn í að við náum þeim markmiðum sem sett hafa verið þegar kemur að orkuskiptum.

Orkuöryggi var mikið í umræðunni á árinu, málefni sem við höfum lengi talað fyrir og munum gera áfram. Stundum er eins og ekkert þokist áfram og þegar horft var á heimildarmyndina Rafhring Íslands á RÚV í sumar voru, 50 árum síðar, enn mörg kunnugleg stef – orkuskortur, olíu- og bensínverð í hæstu hæðum, stríð fyrir botni Miðjarðarhafs og byggingu fyrstu kynslóðar byggðalínunnar að ljúka. Ný kynslóð byggðalínu er nú að taka við.

Við hjá Landsneti erum nú að ljúka okkar fyrsta ári sem fyrirtæki í eigu ríkisins, ári sem hefur verið krefjandi, fullt af verkefnum og sögum – sögum sem við hvetjum ykkur til fylgjast með í framtíðinni á miðlum okkar – vefsíðu, samfélagsmiðum og í Landsnetshlaðvarpinu.